Film suratga olish vaqtida vafot etgan aktyorlar (foto)

Suratga olish maydonlarida baxtsiz hodisa tufayli vafot etgan yoki film olish jarayonlaridan tashqari vaqtda kutilmaganda hayotdan ko‘z yumgan aktyorlarni The Voice Mag yodga oldi.

Hit Ledjer

“Qora ritsar” filmida Joker roli bilan dunyoga tanilgan Lejerning hayoti ayanchli yakun topgan. So‘nggi yillarda aktyorni uyqusizlik bezovta qilar, turli xil uxlatuvchi dorilar ta’sir etmay qo‘ygandi. 2008-yil yanvar oyida “Doktor Parnasning tasavvurlari” filmining uchdan bir qismi olib bo‘lingan edi. Ledjer o‘z uyida uyquga yotishdan avval olti xil uyqu dorilarini ichgan va ertasi kuni tongda uyg‘onmagan. Ekspertiza xulosasi buni tasdiqlagan.

Merilin Monro

“Nimadir sodir bo‘lishi kerak” komediyasini suratga olish paytida aktrisa 36 yoshni qarshilagan edi. 1962-yil 1-iyun uning so‘nggi bor suratga tushgan kuni bo‘lgan. Monro o‘limi haqida turli xil mish-mishlar tarqalgan. Rasmiy o‘lim sababi me’yordan ortiq dozadagi uyqu dorisi deb topilgan. Norasmiy manbalarga ko‘ra, Merilin o‘z joniga qasd qilish, siyosiy qotillik yoki narkotik moddalar iste’moli sababli vafot etgan, degan fikrlar mavjud.

Natali Vud

Natali Vud o‘limidan avval “Aqliy hujum“ filmida Kristofen Uoken bilan suratga tushayotgan edi. 1981-yil 29-noyabr kuni turmush o‘rtog‘i va hamkasbi bilan uchovlon Janubiy Kaliforniya qirg‘oqlari bo‘ylab yaxtada kechki sayohatga chiqadi. Biroq, erkaklar Natalisiz qirg‘oqqa qaytadi. Aktrisaning jasadi suvdan topilgach, jinoiy ish ochilgan. Ular fojiaga aloqador emasligini ta’kidlaydi. Oradan yillar o‘tgach, o‘sha kecha Natali vud va uning eri Robert o‘rtasida janjal chiqqani va erning rafiqasi o‘limiga aloqadorligi haqida xabarlar tarqaldi. Ammo tergov Natalining turmush o‘rtog‘ini hibsga olishga asos topmadi.

Bryus Li

Jang san’ati ustasi 32 yoshida miya shishi tashxisi bilan vafot etgan. Uning Gonkongda ommaviy motamga aylangan dafn marosimidan olingan kadrlar Lining so‘nggi filmi — “Ajal o‘yini”ga ham kiritilgan. Bu ko‘rinish film qahramoni Billi Louning dafn marosimi sifatida namoyish etilgan.

Pol Uoker

Gollivudning mashhur yulduzi, “Forsaj” filmi franshizalaridagi roli bilan muxlislar qalbidan joy olgan Pol Uoker 2013-yil 30-noyabrda fojiali tarzda vafot etgan. U sport avtoulovining yo‘lovchilar o‘rindig‘ida bo‘lganida avtohalokatga uchragan. O‘sha vaqt “Forsaj-7” filmining suratga olish jarayonlari davom etayotgan edi. Film so‘nggi qismida kompyuter grafikasi orqali aktyorning raqamli nusxasi yaratilgan va film oxirigacha tugallangan.

Filipp Seymur Xoffman

Aktyor 2014-yil 2-fevral kuni 46 yoshida narkotik moddalarni haddan ortiq iste’mol qilish oqibatida vafot etgan. O‘sha vaqtlar Filipp “Hayot-mamot o‘yinlari” filmining 1-qismida Plutarx Xevensbi obrazini ijro etayotgan edi. Uning o‘limi filmni nihoyasiga yetkazishga ta’sir qilmagan, chunki Filipp barcha kerakli sahnalarda rol o‘ynab bo‘lgan edi.