Toshkent shahar IIBB Yo‘l harakati xavfsizligi boshqarmasi Yakkasaroy tumanida Yutong rusumli elektrobus bilan sodir bo‘lgan yo‘l-transport hodisasi yuzasidan ma’lumot berdi.
Qayd etilishicha, 20-fevral kuni soat 09:30 larda Yakkasaroy tumani Kichik halqa avtomobil yo‘li ko‘chasi, Newport sotuv ofisi qarshisida Yutong rusumli elektrobus boshqarib ketayotgan 27 yoshli D.S. rul boshqaruvini yo‘qotib, yo‘lning qarama-qarshi bo‘lagiga chiqib ketgan. Oqibatda u qarama-qarshi yo‘nalishdan harakatlanib kelayotgan 44 yoshli X.M. boshqaruvida bo‘lgan Cobalt rusumli avtoulovi bilan to‘qnashgan.
Shundan so‘ng, Yutong 28 yoshli A.A. boshqaruvida bo‘lgan boshqa bir Yutong bilan YTH sodir etgan.
Yo‘l-transport hodisasi natijasida D.S. boshqaruvida bo‘lgan elektrobus ichida ketayotgan 20 yoshli yo‘lovchi tan jarohat olib, shifoxonaga murojaat qilgan. Holat yuzasidan surishtiruv harakatlari olib borilmoqda.
Comments
0 comment