Qozog‘iston sobiq bosh vaziri yangi lavozimga tayinlandi

Qozog‘istonning sobiq bosh vaziri Alixan Smoilov Oliy auditorlar palatasi raisi etib tayinlandi. Bu haqda Tengrinews xabar berdi.

Ungacha mazkur lavozimni Natalya Godunova egallagandi. U 1-aprel kuni o‘z lavozimidan ozod etilgan. Alixon Smoilov 1972-yil Olmaota shahrida tug‘ilgan. 1994-yilda Al-Farobiy nomidagi Qozog‘iston davlat Milliy universitetini amaliy matematika, 1996-yil prezident huzuridagi Qozog‘iston menejment, iqtisodiyot va prognozlash institutini tamomlagan, davlat boshqaruvi magistri ilmiy darajasiga ega.

Alixon Smoilov 2022-yil 11-yanvardan Vazirlar Mahkamasi rahbari lavozimida ishlab kelayotgandi. Uning yangi lavozimidagi ilk harakatlaridan biri 180 kun davom etgan yonilg‘i narxlarini davlat tomonidan tartibga solish bo‘ldi. 2024-yil fevralda Qozog‘iston prezidenti Qosim-Jo‘mart To‘qayev hukumatni tarqatib yubordi. O‘shanda Smoilov o‘rniga prezident administratsiyasi rahbari Oljas Bektenov bosh vazir etib tayinlangandi.