Salexard sudi Lyudmila Navalnayaning tergovchilar harakatsizligi haqidagi shikoyatini ko‘rib chiqmasdan qoldirdi. Bu haqda 4 mart, dushanba kuni FBK direktori Ivan Jdanov o‘zining Telegram-kanalida ma’lum qildi.
Aleksey Navalniyning tarafdori ta’kidlashicha, bu shikoyat muxolifatchi siyosatchi onasi tomonidan yuborilgan, chunki xavfsizlik kuchlari siyosatchi jasadini bir necha kun davomida qarindoshlariga berishdan bosh tortgan.
Navalniyning o‘limi yuzasidan tergovdan oldingi tekshiruv davom etmoqda. «Bu tekshiruv hech narsa bilan tugamasligi aniq, ammo advokatlar jinoyat ishini qo‘zg‘atishdan butunlay voz kechish va bu rad etish ustidan shikoyat qilish darajasiga qadar barcha rasmiy tartib-qoidalarni olib boradi. Ertami-kechmi haqiqiy tergov o‘tkaziladi», - deya yozgan Jdanov.
Aleksey Navalniyning o‘limi
Uzoq muddatli qamoq jazosiga hukm qilingan Aleksey Navalniy 16 fevral kuni Yamal-Nenets avtonom okrugi Xarp qishlog‘idagi «Polyarnyy volk» maxsus rejimli koloniyasida vafot etdi. Uning o‘limi haqidagi hisobotda aytilishicha, 47 yoshli siyosatchi «tabiiy sabablar» tufayli vafot etgan. FBK yaratuvchisining tarafdorlari u o‘ldirilgan deb hisoblayapti. Navalniy qamoqda o‘tirgan vaqtida 27 marta jazo kamerasiga jo‘natilgan.
Aleksey Navalniyning jasadi onasi Lyudmila Ivanovnaga faqat 24 fevral kuni berildi. Bundan oldin u Navalniy bilan xayrlashmasdan yashirin dafn marosimiga rozilik berishni talab qilgan Tergov qo‘mitasining ultimatumidan shikoyat qilgan. Lyudmila Navalnaya bu talabni bajarishdan bosh tortdi. Navalniyning dafn marosimi 1 mart kuni Moskvada, Borisov qabristonida bo‘lib o‘tdi. Hibsga olish tahdidlariga qaramay, minglab odamlar siyosatchi bilan xayrlashish uchun kelgan. Dafn marosimidan bir necha kun o‘tgach ham odamlar siyosatchining qabri oldiga gul qo‘yish va u bilan xayrlashish uchun navbatda turibdi.
Comments
0 comment