Moskvaning Xoroshevskiy tuman sudi talaba Alina Olexnovich va bitiruvchi Ivan Trofimov ishi bo‘yicha ayblov hukmini chiqardi. 21 yoshli Olexnovich va 22 yoshli Trofimov «ekstremistik hamjamiyat» tashkil etishda ishtirok etganlikda aybdor deb topilib, har biri 3 yil-u 6 oyga qamoq jazosiga hukm qilindi, deb xabar berdi «Mediazona» 14 mart, payshanba kuni sud qaroriga tayanib.
Ish materiallarida ko‘rsatilishicha, faollar «Rossiya hududida qo‘poruvchilik faoliyati bilan shug‘ullanuvchi» Aleksey Navalniyning «yashirin shtablari» tarmog‘iga aloqador. Ular 2023 yil 26 iyulda hibsga olingan, shundan so‘ng Moskvaning Basmanniy sudi uy qamog‘iga jo‘natilgan va ikki haftadan so‘ng tergov izolyatoriga o‘tkazilib, hukm chiqarilgunga qadar u yerda saqlangan.
Solovyov faollarni Navalniyning «yashirin shtablari»ga aloqador ko‘ryapti
«Meduza» ta’kidlaganidek, Olexnovich va Trofimov qo‘lga olinganidan so‘ng Vladimir Solovyov ularni Navalniyning «yashirin shtablari» faollari deb atagan. O‘z navbatida, «Kommersant» 2023 yil sentabrida hibsga olish muddatini uzaytirish bo‘yicha yig‘ilishdan so‘ng tergov Olexnovich va Trofimovni Rossiyada «qo‘poruvchilik faoliyati» bilan shug‘ullanayotgan Navalniyning «yashirin shtablari» tarmog‘i bilan bog‘laganini yozgan.
Sud saytidagi kartochkada ish 9 yanvar kuni ro‘yxatga olingani va bir majlisda ko‘rib chiqilgani ko‘rsatilgan. Navalniyning «yashirin shtablari» ishi bo‘yicha Aleksey Malyarevskiy, Artemiy Perevozchikov va Sergey Streknev ham qo‘lga olingan, deb yozadi «Meduza». Ular, Olexnovich va Trofimov singari, «Memorial» tomonidan siyosiy mahbuslar sifatida ko‘riladi.
Comments
0 comment