Toshkentda kreditini to‘lolmagan fuqaroning Cobalt’i auksionga chiqarildi 

Toshkent shahar Mirzo Ulug‘bek tumanida kreditini to‘lolmagan fuqaroning Cobalt’i auksionga chiqarildi. Bu haqda MIB axborot xizmati “Daryo”ga xabar berdi. 

Maʼlum qilinishicha, fuqarolik ishlari bo‘yicha Mirzo Ulug‘bek tumanlararo sudining 2023-yildagi ijro varaqasiga asosan qarzdor SH.P.dan undiruvchi bank foydasiga 183 million 278 ming 099 so‘m miqdorida kredit qarzdorligini undirish to‘g‘risidagi ijro hujjati byuroning Mirzaobod tumani bo‘limi ish yurituviga 2024-yilda kelib tushgan va ijro ishi yuritishni qo‘zg‘atish to‘g‘risida qaror qabul qilinib, ijro harakatlariga kirishilgan.

Majburiy ijro harakatlari davomida, garov mulki bo‘lgan Cobaltʼga nisbatan qidiruv eʼlon qilinib, davlat ijrochisining saʼy-harakatlari bilan ushbu avtotransport vositasi 11-martda topilib, jarima maydonchasiga joylashtirilgan.

Ijro harakatlari davomida qarzdorlik bartaraf etilmagani sababli ushbu avtomobil 14-martda 144 million 400 ming so‘m boshlang‘ich narxda onlayn-auksion savdolariga chiqarilgan.