Ijtimoiy tarmoqlarda Chinoz tumanida kelin qaynonasi va eri tomonidan kaltaklangani haqida xabarlar tarqaldi. Holat yuzasidan Toshkent viloyati IIBB matbuot xizmati xabar berdi.
Maʼlum qilinishicha, 16-yanvar kuni Oqqo‘rg‘on tumanida 1988-yilda tug‘ilgan fuqaro (K.G.) va uning 2001-yilda tug‘ilgan turmush o‘rtog‘i (Sh.U.) o‘rtasida oilaviy kelishmovchilik sababli janjal kelib chiqqan.
Janjal vaqtida fuqaro ayolni urib, tan jarohati yetkazgan. Jabrlanuvchi Chinoz tumani tibbiyot bo‘limiga murojaat qilgan.
1988-yilda tug‘ilgan K.G. protsessual tartibda ushlanib, unga nisbatan Jinoyat kodeksining 126(1)-moddasi (oilaviy maishiy zo‘ravonlik) bilan jinoyat ishi qo‘zg‘atilgan. Tergov harakatlari davom etmoqda.
Jabrlanuvchining tan jarohatlari bo‘yicha sud-tibbiyot ekspertizasi tayinlangan.
Holat Toshkent viloyati IIBB tomonidan qatʼiy nazoratga olingan.
Comments
0 comment