Qozog‘iston davlat qarzi miqdori ma’lum bo‘ldi 

Qozog‘iston moliya vaziri Madi Takiyev mamlakatning davlat qarzi miqdori haqida ma’lumot berdi. Bu haqda Tengrinews xabar berdi.

Takiyevning so‘zlariga ko‘ra, 2024-yil 1-yanvar holatiga asosan davlat qarzi 27 trillion tengeni (salkam 59 milliard 803 million dollar) tashkil qilgan.

2023-yil qozog‘istonlik deputat Yerlan Sairov Qozog‘iston davlat qarzi hajmi umumiy byudjetning 40 foizini tashkil etishini aytib, bu ma’lum xavflarni yuzaga keltirishini ta’kidlagandi. 

U hukumat davlat qarzi hajmini oshirmaslik choralarini ko‘rayotganini qo‘shimcha qilgan edi.

Ma’lumot o‘rnida, O‘zbekiston davlat qarzi 2023-yil 1-iyul holatiga ko‘ra 31,5 mlrd AQSH dollarni, yalpi ichki mahsulotga nisbatan 36,8 foizni tashkil etgan. Xalqaro valyuta jamg‘armasi O‘zbekistonning davlat qarzini “mo‘tadil” deya baholagan.