Peterburgda o‘zbekistonlik haydovchi killer tomonidan adashib o‘ldirilgani aniqlandi.

Rossiya Ichki ishlar vazirligi Sankt-Peterburgda advokatni o‘ldirish uchun yollangan, ammo adashib, uning haydovchisini otib tashlagan gumondorni qo‘lga oldi. Jabrlanuvchi O‘zbekiston fuqarosi bo‘lib, olgan jarohatlaridan shifoxonada vafot etgan.

Tergov ma’lumotlariga ko‘ra, 58 yoshli advokat 51 yoshli tadbirkor bilan «ish yuzasidan» janjallashib qolgan. So‘ngra, tadbirkor avval sudlangan 50 yoshli do‘stiga 5 million rubl evaziga advokatni «yo‘q qilishni» buyurgan. Ammo ijrochi oxir-oqibat advokatni uning shaxsiy haydovchisi bilan adashtirib yuborgan. O‘zbekistonlik haydovchi advokatga tegishli Toyota Camry avtomobilida uning farzandini maktabga olib borganida killer uni to‘pponchadan otib tashlagan.

Jabrlanuvchi og‘ir ahvolda shifoxonaga yotqizilgan, biroq ikki kundan keyin vafot etgan.

Tergov qo‘mitasi qotillikka suiqasd fakti bo‘yicha jinoyat ishi qo‘zg‘atgani ta’kidlanmoqda.