Samarqand viloyati Ekologiya boshqarmasi davlat inspektorlari tomonidan 2024-yilning fevral oyida viloyatning shahar va tumanlarida o‘tkazilgan ekologik nazorat tadbirlari davomida qum-shag‘al va tuproq aralashmalarini noqonuniy qazib olish bilan bog‘liq 52 ta holat aniqlangan. Bu haqda Ekovazirlik matbuot xizmati xabar berdi.
Xabarga ko‘ra, Ishtixon tumanida 7 ta, Oqdaryo tumanida 4 ta, Jomboy tumanida 1 ta, Narpay tumanida 1 ta, Kattaqo‘rg‘on tumanida 1 ta, Qo‘shrabot tumanida 19 ta, Payariq tumanida 7 ta, Samarqand tumanida – 1, Nurobod tumanida – 3, Urgut tumanida – 1, Toyloq tumanida – 3, Samarqand shahrida – 4 ta huquqbuzarlik sodir etilgan.
Aniqlangan holatlar yuzasidan barcha huquqbuzarlarga nisbatan Maʼmuriy javobgarlik to‘g‘risidagi kodeksining 70-moddasi 1-qismi 1-bandiga (daryolarning o‘zanlarini tozalashga va qirg‘oqlarini mustahkamlashga doir ishlarni amalga oshirish tartibini buzish) asosan maʼmuriy bayonnoma tuzilgan.
Jarimalarning umumiy summasi 330 mln 480 ming so‘mni tashkil etgan.
Comments
0 comment