Qurolli guruhlar Gaitining Port-o-Prensdagi asosiy qamoqxonasiga hujum qilib, yuzlab mahbuslarni ozod qildi. Bu haqda Gazette Haiti portali va CNN telekanali mahalliy hokimiyatga tayanib xabar berdi.
Gaiti politsiya uyushmasi X ijtimoiy tarmog‘idagi postida (sobiq Twitter) poytaxtdagi transport vositalari va qurol-yarog‘larga ega bo‘lgan barcha politsiyachilarni qamoqxona nazoratini saqlab qolish uchun kurashda yordam berishga chaqirdi. Hozircha jabrlanganlar va qurbonlar haqida ma’lumot berilmagan. Mahbuslar ozod etilganidan keyin qamoqxona qo‘riqchilari qo‘yib yuborilgan.
Gaiti bosh vaziri Ariel Genri Keniya rasmiylaridan mamlakatga tinchlikparvar kontingent yuborishni so'ragan. Xavfsizlik xizmatining Port-o-Prensdagi bir qancha manbalari qurolli guruhlar tomonidan amalga oshirilayotgan zo'ravonliklarning kuchayishini misli ko'rilmagan deb atadi.
CNNning Gaiti huquq-tartibot idoralaridagi manbasining aytishicha, jinoiy guruhlar shahar bo‘ylab bir necha politsiya bo‘limlariga hujum qilib, kamida to‘rt kishini o‘ldirgan va ba’zi stansiyalarni yoqib yuborgan. Aeroport yaqinidagi otishma tufayli aviakompaniyalar Gaitiga parvozlarni to‘xtatishga qaror qildi.
Gaitidagi xavfsizlik vaziyati 2021-yilda prezident Jovenel Moisening o‘ldirilishidan keyin ancha yomonlashdi. Telesur telekanali maʼlumotlariga ko‘ra, jinoiy guruhlar poytaxt hududining 80 foizini nazorat qiladi. Ayrim jinoiy guruhlar hukumatni kuch bilan ag‘darish rejalarini e’lon qilishdi.
Comments
0 comment