“Britaniya Qora dengizdagi hujumlarni amalga oshirishda Ukrainaga yordam bermoqda” — Mariya Zaxarova

Kiyev rejimining Rossiya dengiz flotiga qarshi hujumlarini Buyuk Britaniya maxsus xizmatlari boshqarib kelgan. Bu haqda 29-fevral kuni Rossiya Tashqi ishlar vazirligi matbuot kotibi Mariya Zaxarova maʼlum qildi. Bu haqda “TASS” nashri xabar berdi.

“Aniqlanishicha, britaniyaliklar AQSH bilan birgalikda Kiyev rejimini nishonlar koordinatalari bilan taʼminlab, kuzatuvchi vazifasini bajargan. Qora dengiz flotiga qarshi teraktlarga kelsak, ular tom maʼnoda Britaniya maxsus xizmatlari ko‘rsatmasi ostida amalga oshirilgan”, — degan Zaxarova.

Zaxarovaga ko‘ra, Britaniya maxsus xizmatlari Ukrainada Rossiyaga qarshi faol ishlamoqda. Ular to‘g‘ridan-to‘g‘ri teraktlar va hujumlar uyushtirmoqda. Avvalroq Kreml matbuot kotibi Dmitriy Peskov ham Buyuk Britaniya Ukrainaga yordam berayotgani va mojaroda samarali ishtirok etayotganini maʼlum qilgan edi.