“Rossiya va AQSH koinot sohasida hali ham hamkorlik qilmoqda” — Rossiya rasmiysi

Rossiya va AQSH kosmosda, xususan, Xalqaro kosmik stansiya loyihasi doirasida hamkorlikni davom ettirmoqda. Bu haqda Rossiya Federatsiyasi bosh vaziri o‘rinbosari, sanoat va savdo vaziri Denis Manturov 4-mart kuni maʼlum qildi. “TASS” bu haqda xabar bermoqda.

“Biz koinot bo‘yicha xalqaro muloqotga ochiqmiz. Biz hozirgi qiyin sharoitda ham AQSH bilan hamkorlikni davom ettiryapmiz”, — degan yuqori martabali Rossiya rasmiysi.

Xabarda aytilishicha, Rossiya davlat aerokosmik korporatsiyasi Roskosmos NASA bilan hamkorlikdagi o‘zaro parvozlar dasturini 2025-yilgacha uzaytirgan. Mamlakatlar uzoq muddatli hamkorlikni nazarda tutgan yangi shartnoma borasida ham ish olib bormoqda.

Ukrainadagi urush sharoitida ikki mamlakat manfaatlariga javob beruvchi bu hamkorlik tomonlarni to‘la qarama-qarshilikdan saqlab turadigan omil sifatida ko‘rilmoqda. Siyosiy raqobat ilmiy-texnik hamkorlikka ta’sir etmagani aytilgan.